Eva Rodríguez é coautora do informe “El coste de la soledad no deseada en España”

Este estudo estima os custos que ocasiona a soidade non desexada en España desde unha perspectiva social. Estímanse, tanto os custos tanxibles (custos sanitarios e perdas de produtividade), como as perdas de calidade de vida.

Este estudo, financiado pola Fundación ONCE, ten como obxectivo principal mostrar á sociedade os custos que produce anualmente a soidade non desexada no noso país. O estudo pretende poñer en cifras e alertar á sociedade sobre a que xa se considera, xunto coa obesidade e o estrés, a epidemia do século XXI. Ademais, o estudo desenvolveu unha metodoloxía robusta para medir os custos da soidade que pode servir de inspiración en futuras investigacións, dado que non só cuantifica os custos monetarios senón tamén a perda de benestar que esta situación produce.

Estímase que a soidade non desexada representa un custo tanxible aproximado de 14 mil millóns. Aproximadamente o 55 % destes custos correspóndese con perdas de produción. O resto de custo monetario está relacionado con custos directos relacionados cunha maior frecuentación de servizos sanitarios e un maior consumo de medicamentos relacionados con enfermidades asociadas á soidade. Ademais, a perda de calidade de vida estimouse en máis de 1 millón de Anos de vida axustados por calidade.

Os resultados deste estudo tiveron un amplo impacto mediático en prensa, televisión e xornadas especializadas.